எங்கும் கண்ணன்

 

அதிகாலையின் அற்புத மயக்கத்தில் மாடி ஏறி

ஏகாந்தமாய் இயற்கையின் இன்பத்தைப் பருகியபடியே

சுற்றி நடக்கும் கோடானுகோடி விந்தைகளில்

சிந்தையை சுழற்றும்போது தோன்றிய எண்ணங்கள் இவை

இருளில் இதமான போர்வையாயிருந்து விடியலில்

வெளிச்சத்தில் சிவக்கும் வானமும் வாமனனே

அனைத்து உயிர்களுக்கும் அளவிலாத பயிர்களுக்கும்

ஊட்டமும் ஊக்கமும் அளிக்கும் ஆதவனும் மாதவனே

வாடிய காலத்தில் எங்கிருந்தோ வந்து

வான்மழை பொழியும் மேகமும் மோகனனே

கடலிலும் கானகத்திலும் பாலையிலும் விரவி

தரணிக்கு உயிரூற்றும் காற்றும் கண்ணனே

அன்புடன் கன்றீன்று பாசமாய் பால்பொழிந்து

அகிலத்தின் பசிதீர்க்கும் பசுவும் பரந்தாமனே

இருந்தால் உழைத்திரு இல்லாவிடில் காணாதுபோவென

உயிர்ப்புடன் போதிக்கும் பறவையும் பரப்ரம்மமே

வளர்பிறையும் தேய்பிறையும் வாழ்வின் நியதியென்று

வானிருந்து வாக்குரைக்கும் நிலவும் நீலவண்ணனே

நாள்தோறும் நலிவுற்றாலும் நிலையாக நமைத்தாங்கி

பொறுமையாய் காத்தருளும் பூமியும் புருஷோத்தமனே

மாற்றாந்தாயென இல்லாமல் அனைவர்க்கும் சரிசமமாய்

தம்முயிரை தந்தருளும் மரஞ்செடியும் மதுரமாயவனே

அளக்கவியலா அகன்ற அண்ட சராசரமாய் அமைந்து நமை

பிரமிப்பில் ஆழ்த்தும் பிரபஞ்சமும் பரஞ்சோதியே

அருமையாய்ப் பெற்றெடுத்து ஆளாக்கி பெருமையுடன்

அவனியில் சேர்த்திட்ட அன்னையும் அனிருத்தனே

யார் பெற்ற பிள்ளையையோ மணாளனாய் தான்கொண்டு

மனதளவில் மன்னனாக்கும் மனைவியும் மதுசூதனனே

இன்பம் மட்டுமல்ல வாழ்க்கை இன்னொரு பக்கமுமுண்டு என

பொறுப்பை நமக்குணர்த்தும் பிள்ளைகளும் பார்த்தசாரதியே

நல்வழி தீவழி எவையென்று தெரியவைத்து பிறழாமல்

தோள்கொடுத்து தாங்கிநடக்கும் நண்பனும் நந்தகுமாரனே

எண்ணங்களைப் பகிர்ந்துகொண்டு இன்னும் உயர்ந்திட

உற்சாகமூட்டிடும் உடன்பிறப்புகளும் உபேந்திரனே

எண்ணிலாத நற்செயல்கள் எப்பொழுதும் நலமாய் நடந்திட

எங்ஙனும் நிறைந்திருக்கும் சக்தியும் சனாதனனே

இருக்கும் வரை அடங்காமல் இயங்கி ஒரு நொடியில்

இல்லாமல் ஆக்குமுயிரை இயக்குபனும் ஈச்வரனே

ஆறறிவுக்குமேல் ஆயிரம் அறிவுகொண்டும்

ஆராயமுடியாத ஆத்மாவின் நாதனும் நாராயணனே

அக.27, 2021