முக்திக்கு வழிகாட்டு மாயவனே

 

அரக்கனின் சிறையில் பிறந்தவனே - கண்ணா

ஆயர்பாடியில் வளர்ந்தவனே

ஆநிறை காக்கும் குலத்தவனே - உன்

அன்பர்கள் எங்களையும் காப்பாயே

வசுதேவரின் மகனாய் பிறந்தவனே - கண்ணா

வடபத்ர மஞ்சத்தில் துயின்றவனே

கோவர்தன கிரியை குடைபிடித்து - மழையில்

தேவேந்திரன் கர்வம் கரைத்தாயே

கோபியர் நெஞ்சம் கவர்ந்தவனே - கண்ணா

பாப விமோசனம் அருள்பவனே

துளசி தீர்த்தம் உன் பெயராலே - நிதம்

தூய்மை பெற்றிடத் தருவாயே

இரவல் பெற்ற அவல் தந்தும் - கண்ணா

இறவாச் செல்வம் அளித்தாயே

சுதாமர் மனதில் நின்றதுபோல் -  எமையும்

சதா உன் நினைப்பில் வைப்பாயே

புன்னை மரமும் மயிலிறகும் - கண்ணா

புல்லாங்குழலும் தரும் உன் நினைவே

வாசம் மிக்க வகுளம் போல் - எங்கள்

வாழ்வும் மணக்க கருணை செய்.

பாண்டவர் பக்கம் நின்றவனே - கண்ணா

பாரினில் உனக்கு நிகரில்லையே

பார்த்தனுக்கு சாரதி நீதானே - எம்போல்

பாமரருக்கும் வழி காட்டுவாயே

கொடியோர்களை அழிப்பவனே - கண்ணா

அடியவர்களைக் காப்பவனே

சிறையின் கதவைத் திறந்ததுபோல் - எங்கள்

பிறவியின் கதவை அடைப்பாயே

அத்தத்தின் பத்தில் பிறந்தவனே - கண்ணா

இத்தைத தின்றிங்கே இராமல்

நித்தம் உன்னடி தொழ அருளி  - பிறப்பிலா  

முக்திக்கு வழிகாட்டு மாயவனே

Aug 21, 2021