மாயவன்

 

மாதவம் யாதும் செய்திலையாயினும்

மாதவன் ஆலய தரிசனம் பெற்றேன்

மாநிறை மனதோடு வெளிவரும் வழியில்

விழிநிறை காட்சியும் தந்தான் அம்மாயன்

ஏழைச் சிறுவனவன் ஏதுமில்லாதவன்

ஏந்திய கைபேசியில் படத்தைக் காண

எத்துணை ஆர்வமாய் ஓடி வந்தானோ

வந்தவனை அக்கணமே நான் பிடித்துவிட்டேன்

எடுத்த படத்தைக் காணும்போது தான்

எனக்குள் ஓர் இனம்புரியா எண்ணம்

மனதைச் சுண்டிய சிறுவனின் அழகு

மாயவன் நகைக்கு ஒப்பானதன்றோ

மீண்டும் காண்கையில் நகைக்கிறான் மாயவன்

மற்றொரு விரலால் வானைச்சுட்டி

என்னிலும் அவனைக் கண்டீராயின்

எங்கும் வேற்றுமை மறைந்திடுமன்றோ

அரிதாய்க் கிட்டிய மானிடப் பிறப்பில்

உரித்தாகுமோ உயர்ச்சி தாழ்ச்சி

பரமன் படைப்பில் பேதம் உண்டோ

பரந்த அன்புடன் பார்வையிட்டால்

Aug 15, 2024